NILIJUMUIKA NA WANAWAKE WENZANGU SIKU YA WANAWAKE DUNIANI

 

RISARA YA MGENI RASMI MBUNGE WA VITIMAALUMU ROSE TWEVE SIKU YA WANAWAKE 08/03/2015 KIJIJI CHA IGOWOLE WILAYA YA MUFINDI

          Ndugu Viongozi mbalimbali wa Vyama vya Siasa,                                   Watendaji wa Serikali na Asasi za Kiraia,                                                     Viongozi wa Jumuiya za Dini,                                                                              Waandishi wa Habari,                                                                      Wakina Mama wote,                                                                         Wageni waalikwa,                                                                                      Mabibi na Mabwana.

Ndugu viongozi na wananchi wote mliohudhuria.Napenda kuchukua fursa hii kuushukuru uongozi wa Wilaya ya Mufindi  pamoja na Viongozi wote wa Serikali kwa ujumla kwa maandalizi mazuri kufanikisha shughuli hii ya Maadhimisho ya Siku ya Wanawake Duniani mwaka huu 2016 inayofanyika kiwilaya  hapa Igowole.

Niwashukuru kwa dhati wananchi wote wa wilaya hii, kwa namna mlivyojipanga kwa kushirikisha akina mama, vikundi mbalimbali vya sanaa na burudani kufanikisha Maadhimisho haya.

Aidha, nachukua nafasi hii kutoa shukrani kwa Mashirika, Taasisi za Serikali na Mashirika yasiyo ya Kiserikali ambao wametoa michango yao ya hali na mali katika kufanikisha maadhimisho haya.

 Ndugu wananchi  Napenda nitoe shukrani za dhati kwa kunipa heshima hii kubwa ya kuwa mgeni rasmi katika kilele cha Maadhimisho haya ya Siku ya Wanawake Duniani Kiwilaya  ambayo leo tarehe 08/03/2016  yanafikia kilele chake.

Naomba nikiri, kwa vigezo mbalimbali nilivyoona hapa, nalazimika kusema Maadhimisho haya kwa wilaya yamefana sana. Hongereni sana.

Naamini ushirikiano wenu na wadau mbalimbali umewawezesha kufanikisha maadhimisho haya. Kama nilivyosema awali, napenda kurudia tena kuvishukuru vikundi vya burudani, 2 vikundi vya kijamii na Asasi mbalimbali kwa kujitokeza kwa wingi kuungana na wanawake katika maadhimisho haya muhimu kwa Wanawake duniani.

Ndugu Viongozi na Wananchi Chimbuko la Siku ya wanawake Duniani lilianza miaka mingi na mtakumbuka mwaka 1911 Wanawake kule Nchini Marekani waliandamana kudai haki zao ambazo walikuwa wakizikosa: kama vile kulipwa ujira mdogo, kufanyishwa kazi ngumu na kwa masaa mengi, kukosekana kwa huduma za jamii na ubaguzi wa kijinsia.

Mara baada ya Umoja wa Mataifa kuanzishwa mwaka 1945, lilipitishwa azimio kwamba tarehe 08 Machi ya kila mwaka iwe ni Siku ya Maadhimisho ya Wanawake Duniani.

Kwa hiyo, tunapokutana hapa leo lengo kubwa ni kukumbushana na kuweka mikakati zaidi ya kukabiliana na changamoto mbalimbali zinazowahusu Wanawake. Miongoni mwa changamoto hizo ni unyanyasaji wa kijinsia na athari za kiafya, wanawake kutopewa haki sawa katika maamuzi na kutoshirikishwa. Wanawake katika jamii hutoa mchango mkubwa katika kutunza familia, lakini bado wanaathirika zaidi na maradhi kama vile UKIMWI, vifo vinayotokana na uzazi, kupigwa, kutukanwa, kutelekezwa, kubakwa, ukeketaji, mimba za utotoni, kunyimwa haki ya kumiliki mali, n.k .

Hivyo, kukutana kwetu si kwa ajili ya kufanya sherehe tu, pia ni kufanya tathimini kwa pamoja kutafakari namna gani tumepiga hatua katika kukabiliana na changamoto za Wanawake au bado tuko palepale.

Ndugu Viongozi na Wananchi, Serikali yetu imejitahidi kuweka mikakati ya kutatua changamoto mbalimbali ili kuleta usawa wa maendeleo na amani. Wananchi wamehamasishwa kupitia nyanja mbalimbali kuhusu haki za Mwanamke na Mwanaume, kumiliki Ardhi, kuwaongezea wanawake uwezo wa kiuchumi, kuwashirikisha wanawake kuhifadhi mazingira na kuwapa wanawake nafasi za uongozi. Kama wengi wetu tunavyo fahamu nchi yetu sasa imepiga hatua ya kuwa na kiongozi mwanamke katika ngazi za juu ambaye ni makamu wa Rais  wa Jamuhuri wa Tanzania Samia Suluhu Hasani hii yote ni kuonesha kuwa wanawake tunaweza na haki sasa inapatikana,Wanawake pia wamehamasishwa kuhusu umuhimu wa kujiendeleza kielimu, kiuchumi kiafya kwa kujikinga na magonjwa mbalimbali ikiwemo maambukizi ya VVU na UKIMWI, Saratani ya Matiti na Shingo ya uzazi n.k.

Ndugu Viongozi na Wananchi, Leo hii Duniani kote yanafanyika maadhimisho kama haya na Tanzania ni miongoni mwa Mataifa ambayo yamekuwa mstari wa mbele kutambua mchango wa mwanamke, kuthamini jitihada zake katika kuleta mafanikio na kuhamasisha mabadiliko ya jamii nzima.

Nchi yetu pia inatambua, umuhimu wa mchango wa mwanamke katika shughuli za kisiasa, kijamii na kiuchumi. Hivyo, mwaka huu wilaya ya Mufindi inaungana na nchi nyingine Duniani kuadhimisha Siku ya Wanawake Duniani. Kauli mbiu ya mwaka huu“Pigania Haki na Usawa wa Kijinsia”. Ujumbe huu unaelimisha na kuikumbusha jamii kuhusu umuhimu wa kubadili mtizamo uliopo na kuleta usawa kati ya jinsia zote kwa kuondoa dhuluma mbalimbali za jinsia moja dhidi ya nyingine.

 Pamoja nakuwepo mafanikio katika kuleta usawa wa kijinsia hapa nchini na duniani kote, bado usawa kamili wa kijinsia haujafikiwa kutokana na sababu mbalimbali kama vile; mfumo dume wa maisha uliopo katika baadhi ya maeneo, mila potofu miongoni mwa jamii na mtizamo hasi kwa nafasi ya mwanamke 3 katika masuala mbalimbali ya kijamii, kisiasa na kiuchumi ambapo wanaume wamepewa nafasi kubwa na madaraka zaidi.

Athari za vitendo hivyo ni kuongezeka kwa kasi ya UKIMWI, Watoto wanaoishi katika mazingira hatarishi, ombaomba, elimu duni, wakimbizi, ukosefu wa huduma hususan kwa Watoto.

Kijamii Wanawake huwa dhaifu na pengine kuleta tamaa ya maisha na kuamua kujiingiza katika vitendo visivyofaa ikiwemo ukahaba na hatimaye wengine kupata UKIMWI.

Hata hivyo, Serikali inaendelea kuchukua juhudi za makusudi kuwawezesha wanawake kushiriki katika shughuli za kijamii kielimu, kiafya na kiuchumi ikiwa ni pamoja na ujasiriamali, uzalishaji na usindikaji wa mazao.

Hivyo ni jukumu letu sote kutambua na kuhakikisha kuwa wanawake na wanaume wanazidi kushikamana na kudumisha usawa ndani ya familia ambako ndiko chimbuko la mambo yote ya mabadiliko na usawa wa kijinsia.

Nina hakika mambo haya yakianzia katika ngazi ya familia matokeo yake ni makubwa kwani hatimae jamii nzima itakuwa na mtizamo wa pamoja na kutambua nafasi ya mwanamke kuwa sawa na mwanaume katika nyanja mbalimbali.

 Ndugu Viongozi na Wananchi, Napenda kusisitiza Wanawake na Wanaume na jamii yote kwa ujumla tushirikiane kuchukua hatua zaidi kuchochea mabadiliko miongoni mwetu ili kuhakikisha usawa wa kijinsia unapatikana katika nyanja zote za Elimu, Afya Uchumi, Siasa, Ajira Utamaduni na hata katika shughuli za biashara kwa ajili ya ustawi wa Wilaya,Mkoa na taifa letu kwa ujumla. Mafanikio ya Mabadiliko haya yatapatikana iwapo jamii yote wakiwemo wanaume kushiriki katika kupinga vitendo vinavyobagua jinsia nyingine.

Ndugu Viongozi na Wananchi Baada ya kusema hayo, narudia kuwapongezeni sana, ninawatakieni kheri katika kuhitimisha kilele cha Maadhimisho ya siku ya Wanawake Duniani Ki-Mkoa na Mwenyezi Mungu awabariki sana.

AHSANTENI KWA KUNISIKILIZA